Kecha poytaxtimizning Alisher Navoiy nomli kinosaroyida triller, drama janrida suratga olingan "Hamroh” filmining jurnalistlar uchun yopiq taqdimoti bo`lib o`tdi.

Postanovkachi rejissyor va ssenariy muallifi Akrom Shohnazarov omadli tanlangan aktyorlar jamoasi hamda original mavzu bilan o`z maqsadiga erishdi deb to`la ayta olamiz.

Filmning treyleri taqdim etilganida uning psixologik drama ekanligini payqash murakkab emasli, biroq barcha filmlar xam treyleri kabi tomoshabinni qiziqtira olmagani sababli, film tomoshasidan oldin shunday shubhalar mavjud edi. Biroq shubhalarimiz ortda qolib, "Hamroh” tomoshabinga haqiqattan ham ruhiy ta`sir o`tkaza oldi.

Inson va ruh o`rtasidagi sirli munosabatlar voqeasiga asoslangan film tomoshabinni voqealar ichiga tortib oladi.

Aktrisa Yulduz Rajabova gavdalantirgan ruh bilan muloqotga kirishgan Adiz Rajabov obrazi tomoshabinga psixologik ta`sir o`tkazib, uni birgalikda his etishni uddasidan chiqqan. Filmda aktyor Adiz Rajabovni yangidan kashf qilish mumkin. Uning ruhiy kechinmalari hech bir tomoshabinni befarq qoldirmaydi.

Bundan 7 yil avval ota uyidan qochib ketgan qizining hatto ruhidan ham norozi ota obrazi aktyor Karim Mirhodiev ijrosida a`lo darajada ko`rsatib berilgan. Qiziga bo`lgan mehr va nafratni boshqa aktyor Karim Mirhodievchalik gavdalantirib berolmasdi.

Ota uyini to`yiga bir necha kun qolganda tark etgan qizning o`limiga nima sabab bo`ldi, nima uchun sevgisi uchun barchasidan voz kechgan qizning ruhi bezovta, kim uni bu ko`yga tushishiga sababchi bo`ldi, ruh nima sababdan Adiz Rajabovni ta`qib qilmoqda? Voqealar echimini aytishni joiz topmadik. Barchasini o`zingiz ko`rib, guvohi bo`lishingiz mumkin.

Filmning har bir sahnasini omadli chiqishida operator Rustam Meliev va postanovkachi rassom Alisher To`liboevlarning ishini alohida e`tirof etishni joiz topdik.

Film Buxoro shahri, Jizzah viloyati hamda Toshkent shahrida suratga olingan. Filmni 90 kun davomida 45 kun ichida suratga olingan. Filmga tayyorgarlik ishlari 75 kun davom etgan.

Xulosa qilib aytganda, ruh va inson o`rtasidagi sirli munosabatlarga asoslangan film haqiqattan ham "Yilning eng kutilgan filmi” nomiga da`vogarlik qilishi va tomoshabinlarning sevimli kartinalari qatoridan o`rin olishi shubhasiz.

Film taqdimotiga tushgan bolalarni kattalar ancha vaqtgacha tinchlantirishiga to`g`ri kelgani va filmdagi dahshatli sahnalar ta`sirini inobatga olib, uni bolalar va yuragi bo`shlarga ko`rishni tavsiya etmagan bo`lardik.

Filmdan so`ng ona obrazini gavdalantirgan aktrisa Lola Eltoevani taasurotlari bilan o`rtoqlashar ekan, filmdan juda ham ta`sirlanganini aytib o`tdi.

O`zbekistonda xizmat ko`rsatgan artist Lola Eltoeva:

– Filmni men ham hozirgina tomosha qildim. Film shaxsan o`zimga juda qattiq ta`sir qildi, hali ancha vaqtgacha uning ta`siridan chiqolmasam kerak. Bunday janrda O`zbekistonda ilk bor film suratga olindi desak mubolag`a bo`lmaydi. Kinoijodkorlar oldilariga qo`ygan vazifani a`lo darajada uddaladi deb ayta olaman.

Filmning yopiq taqdimotida kartina bosh rol ijrochilari ijodiy safarda bo`lganliklari bois ishtirok etishmadi.

"Hamroh”ning katta premerasi sanasi hozircha aniq emas. Bu haqda keyinroq ma`lumot beramiz, bizni kuzatib boring!