Хориж актёрларининг рол учун ташқи қиёфасини ўзгартиргани ҳақидаги маълумотларни кўп эшитганмиз. Аслида бу ўзбек актёрлари учун ҳам янгилик эмас. Чунки улар ҳамиша ролнинг ишончли чиқиши учун ташқи қиёфаларини ўзгартиришга, ҳатто қисқа муддатда бир неча килограмм вазн ташлашга ҳам тайёр. «Дарё» мухбири Наргизахон Муродова қуйида ана шундай фидоий актёрлар ҳақида маълумот беради.

Актриса Нигина Анорбоева Рустам Мелиев томонидан суратга олинаётган «Офицер» фильмидаги роли учун узун қора сочларини калталатишга рози бўлди.

— Яхши рол имидж ўзгартиришга арзийди. Режиссёр Рустам Мелиев сочларимни калталатишни сўради, бу таклиф ўзимга ҳам ёқди. Мен ҳамиша ўзига хос характер ва қиёфадаги ролларни кутиб яшайман. Соч ўсадиган нарса, аммо яратилган рол тарихга мухрланади, — дейди актриса Нигина Анорбоева.

Кўплаб муҳокамаларга сабаб бўлган «Бахт овчиси» сериалида Зуля ролини ижро этган актриса Барчин Ғофурова ҳам рол учун сочини калталатишга қарор қилган.

— Сочларим аввал узун ва қоп-қора рангда эди. «Ишқ ўйинлари» сериали режиссёри Озод Шамс рол учун сочларимни калталатишни сўради. Рози бўлиб, сочларимни калталатгандим. «Бахт овчиси» сериали продюсери ва режиссёри сочимни сариқ рангга бўяшимни сўради. Хуллас, рол сабаб услубим бутунлай ўзгариб кетди, — дейди актриса Барчин Ғофурова.

Актёр Улуғбек Қодиров учун қисқа муддатда озишга ёки семириш муаммо эмас. У «Ака» фильми учун 26 килограммга семирган. «Барон» фильми учун эса аввалги вазнига қайтишига тўғри келган. Актёр қисқа вақтда 25 килограмм вазн ташлашга муваффақ бўлган. Актёрнинг таъкидлашича, у тўплаган 120 килограмм вазндан рол ва саломатлиги учун воз кечишига тўғри келган.

— Бу йил ҳам рол учун катта вазн ташлашимга тўғри келди. «Осиё арслони» фильмида асосий рол ижро этаяпман. Кучайтирилган парҳез сабаб 25 килограмм вазн ташладим, — дейди актёр Улуғбек Қодиров.Маълумот учун, «Ўзбекфильм» ҳамда «Беларусфильм» Миллий киностудияси ўртасида ҳамкорликда «Осиё арслони» номли фильмда бош ролни Улуғбек Қодиров ижро этади. Мазкур биографик драма Ўзбекистон ва Беларусда суратга олинади ва келгуси йил 9 майда премьераси бўлиб ўтади.

Актриса Асал Шодиева 2012 йили «Ҳай-ҳай қизалоқ» фильмида Юлдуз ролини ижро этган. Актриса мазкур рол учун сочларини антиқа тарзда калталатган ва рангли улама сочлардан фойдаланган. Ҳамиша нафис имижда кўринган актрисанинг мазкур кўриниши тезда эътиборни тортган. У замонавийликка интиладиган ва миллий қадриятларни унутган қиз ролини моҳирлик билан ижро этган.

— «Ҳай-ҳай қизалоқ» фильмини кўп марта томоша қилганман. Боиси, фильмдаги ролим ўзимга ёқади. Ўзига хослик ва янгича ёндашув бор, — дейди Асал Шодиева.

Айни кунларда АҚШда истиқомат қиладиган актёр Баҳром Матжонов «Ибрат» фильмида суратга тушиш учун уч ой соқолини ўстирган. «Фариданинг икки минг қўшиғи» фильмига таклиф этилганида эса сочларини қиртишлаб олдиришига тўғри келган. Рол мазкур имижни талаб этгани учун у соч-соқолидан осонгина воз кечган.

Ўзбекистонда хизмат кўрсатган артист Боир Холмирзаев «Мендирман Жалолиддин» сериали учун бошқа актёрлар сингари соч ва соқолини ўстирди. Бу натижага эришиш учун у тахминан икки йил сарфлади. Сериалда иштирок этувчи бошқа актёрлардан фарқли равишда унинг сочлари анча узун.

Бундан роппа-роса 7 йил аввал хонанда Лола «Хайр» номли қўшиғига клип суратга олган. Клип ўзига хослиги билан бошқа клипларга ўхшамайди. Яъни хонанда юз қиёфаси орқали инсон борлиқдан йўқликка ўтиб қолиши акс эттирилган. Имиж ўзгаришида гримёрнинг маҳоратини сезиш қийин эмас. Хонанда клип учун сочларини олдирмаган. Шунчаки, бошига ниқоб кийган холос.

Баҳром Назаровнинг «Ҳижрон» клипида Ситора Алимжонова ва Али Отажонов учун шунга ўхшаш имиж яратилган. Яъни улар бошларига ниқоб кийиб бемор одам ролини ижро этган. Ижро ва моҳирлик билан яратилган имиж сабаб клип таъсирли чиққан.