Ёдингизда бўлса, 10-15 йиллар аввал хусусий фильмлар оммалашганда режиссёрлар ёппасига машҳур қиёфалардан фойдаланишни бошлашди. Ўшанда хонанда, раққоса, ҳатто дизайнерлар ҳам фильмларда асосий қаҳрамонлар ролини ижро этишган эди. «Чумчуқ сўйса ҳам қассоб сўйсин», деганларидек, омадсиз ижролар ҳам кўпайган. Қуйида сизга фильмда суратга тушолмаслигини англаб етган ижодкорларни таништириб ўтамиз.

Аслида «Кечир» фильмидаги Самира Райҳоннинг илк роли эмас. У хонандалик фаолиятидан аввал 1999 йили суратга олинган «Занжир» сериалида Наргиза ролини ижро этган. Ундан кейин мусиқий фильмларда суратга тушди. 2007 йили эса «Кечир» драма фильмида Самира ролини ижро этди. Баъзи маълумотларга кўра, у фильмнинг сценарий муаллифи ва продюссери ҳам ҳисобланади. Фильм кутилганидек муваффақиятли чиқмагани учунми ёки бошоғриқлари сабабми Райҳон ортиқ фильм суратга олмасликка ва роль ижро этмасликка аҳд қилган.

Лола Аҳмедова 

Ўзбекистонда хизмат кўрсатган артист Лола Аҳмедова 2004 йил суратга олинган «Муҳаббатимсан» фильмида бош ролни ижро этган. Аммо фильм хонанданинг ижодий фаолиятига жиддий таъсир кўрсатмаган.

— Фильмда суратга тушишни истамаганман. Табиатан тортинчоқ бўлсам, кадрда рол ижро этолмайман, деб таклифни рад этгандим. Шунда раҳматли актёр Мирза Азизов «Мен сизга ёрдам бераман, ролни зўр қилиб ўйнайсиз», деб мотивация берганди. Мана шу инсон сабаб ролни қабул қилганман. Аммо суратга олиш майдончасида қийинчиликлар бўлган. Шу боис ортиқ фильмларда суратга тушмасликка жиддий аҳд қилганман, — дейди хонанда Лола Аҳмедова.

Нилуфар Усмонова 

Нилуфар Усмонова «Муҳаббат синовлари» фильмидан сўнг Зебо Наврўзованинг «Бўрилар» фильмида асосий роллардан бирини ижро этган. Аммо ундай кейинги таклифларни рад этди.

— Мен актриса эмасман, шу боис роль учун сарфлаган энергиямни янги қўшиқлар яратишга йўналтирганим маъқул, — дейди хонанда.

Зиёда «Ижарачилар»

Ўзбекистонда хизмат кўрсатган артист Зиёда ижодининг илк йилларида кўплаб фильмларда суратга тушган. У «Бойвачча», «Аччиқ ҳаёт», «Нортой», «Бекорчилар макони», «Энагалар», «Ижарачилар» ва «Учрашув» фильмларида роль ўйнаган. У Жаҳонгир Позилжоновнинг комедия фильмларида навбатчи актриса бўлган, десак хато бўлмайди. Аммо хонанда кейинги пайтларда фильмларда суратга тушаётгани йўқ. Унинг вақти тиғиз, балки ортиқча рекламага ҳам зарурат сезмаётгандир.

Нигора  

Илгари Нигора ҳам фильмларда фаол бўлган. У Жаҳонгир Позилжоновнинг «Бойвачча», «Шомурод ва Дурдона» ва «Олинг қуда, беринг қуда» фильмларида бош ролларни ижро этган.

— Ҳозир учта бола ва халқ хизматидан ортиб, фильмда суратга тушишга вақтим йўқ. Менимча, аввалгидек фильмлар ҳам суратга олинмаяпти, — дейди хонанда Нигора.

Руҳшона  

Хонанда Руҳшона қўшиқлари оммалашмасидан аввал «Бекорчилар макони», «Энагалар» ва «Хизмат доирасидан ташқари» фильмларида суратга тушган. Сўнгги фильмида хонанда Гули ролини ижро этган.

— Фильмларда суратга тушишини ёқтираман. Узоқ танаффусдан кейин Дилшод Аҳмедовнинг «Хулиган» сериалида суратга тушяпман. Суратга олиш майдончасига бориб, рол ўйнашни соғинганимни ҳис қилдим, — дейди хонанда Руҳшона.

Улуғбек Раҳматуллаев 

Ўзбекистонда хизмат кўрсатган артист Улуғбек Раҳматуллаев 2005 йилда «Наҳотки сен» фильмида талаба йигит эпизод ролида суратга тушган. Ундан сўнг «Вой-дод сумалак» ва «Ада эмас, дада» фильмларида суратга тушган. Энг сўнгги ролини эса 2012 йилда суратга олинган «Ақл ва юрак» фильмида ижро этган. Мазкур фильмда ундан ташқари Зарина Низомиддинова, Муниса Ризаева, Алишер Узоқов ва Севара Солиева ҳам суратга тушишган.

Муниса Ризаева  

Муниса Ризаева илк бор 2010 йилда режиссёр Ёдгор Носировнинг «Ҳижрон» фильмида роль ижро этади. Ундан сўнг «Фирибгар», «Ҳай-ҳай қизалоқ», «Ақл ва юрак», «Кичкина хўжайин», «Салом, Наташа», «Нафс» ва сингари кинолардаги турли характердаги роллари орқали актриса сифатида томошабинлар эътиборини қозонади. Аммо хонанда «Кичкина хўжайин» ва  «Салом, Наташа» фильмларида рол ижро этганидан афсусланишини айтганди.

Лола  

Хонанда Лола Йўлдошева илк ролини 1999 йили суратга олинган «Наврўз айёми» мюзиклида суратга тушган. Ундан сўнг «Севинч», «Келгинди куёв», «Ярим бахт», «Жодугар», «Ёндиради-куйдиради», «Ғаройиб орзулар» ва «Бу телба муҳаббат ёхуд Фарҳод ва Ширин» фильмларида суратга тушган. Афсуски, хонанда 2014 йилдан буён бирорта фильмда суратга тушаётгани йўқ.

Шаҳзода  

Хонанда Шаҳзода илк ролини 2000 йили суратга олинган «Тоҳир ва Зуҳра» мусиқали фильмида ижро этган. Ундан сўнг «Севинч», «Сарвиноз», «Фотима ва Зуҳра», «Зумрад ва Қиммат», «Мажруҳ», «Нафс» ва «О Марям, Марям» фильмларида суратга тушган. Сўнгги ролини 2016 йили суратга олинган «Наврўз муборак» мюзиклида ижро этди.

Манзура  

Хонанда Манзуранинг фильмографияси актрисаларникидан кам эмас. У илк ролини 2000 йили суратга олинган «Тоҳир ва Зуҳра янги талқинда» мюзклида ижро этган. Ундан сўнг «Муҳаббат синовлари», «Наҳотки сен», «Севгинатор» каби фильмларда суратга тушган. Айниқса, «Севгинатор» фильмидаги Маломат роли томошабинлар томонидан илиқ қарши олинган.

Шароф Муқимов  

Шароф Муқимов илк ролини 2002 йилда Муҳаммад Исмоил сценарийси асосида суратга олинган «Балоғат бекати» фильмида ижро этган. Мазкур фильм «Ассалом, Ўзбекистон» кўрсатувида бир неча қисмларга бўлиб намойиш этилган. Ундан сўнг Бурҳон Шароповнинг «Жоним сени ёхуд эгизаклар», «Ниқоб» фильмларида, режиссёр Музаффар Эркиновнинг «Армон» фильмларида суратга тушди. 2015 йилда собиқ турмуш ўртоғи Севинч Мўминова билан бирга «Бахт ортидаги дард» фильмида суратга тушди.

Шоҳруҳхон  

Хонанда Шоҳруҳхон илк ролини 2006 йилда «Рамео ва Жулетта ёхуд лаънатланган севги» фильмида ижро этган. Ундан сўнг «Ярим бахт», «Апрель-май», «Бўрилар», «Қувғин», «Шаҳарлик олифта», «Охирги қарз», «Соғинч», «Эрка куёв» ва «Сен кетма» каби фильмларда суратга тушган.

Севинч Мўминова  

Хонанда Севинч Мўминова хонандалик фаолияти бошламасдан аввал 2002 йилда кинорежиссёр Қамара Камолованинг «Дилҳирож» фильмида суратга тушган. Ундан сўнг «Бахт учун миллион», «Цунами» ва «Бахт ортидаги дард» фильмларида асосий ролларни ижро этган.

Дилниёз Ғаффоров 

«Элдидо» гуруҳи  вакили Дилниёз Ғаффоров асли мутахассислиги бўйича актёр, шу боис унга фильмларда суратга тушиш қийинчилик туғдирмайди. У «Севги фариштаси», «Сўнгги нафасимгача», «Кунлардан бир кун», «Андижонча муҳаббат» фильмларида суратга тушган. Дилноза Кубаева билан суратга тушган фильми томошабинлар томонидан илиқ қарши олинган.